LURRAXKA

LURRASKAKO IRTEERA

         Zikloaren amaiera hurbil, bi eguneko irteera izan genuen maiatzaren azken egunarekin batera Bizkaia aldera, Lurraska Ingurumen Zentroara hain zuzen ere. Lurraska Ajangizen dago, Gernikatik urre. Bertan ingurumenarekin lotutako jarduerak antolatzen dituzte eta gure ikasleek “Animalien aztarnak” eta “Abereak” izeneko tailerrak eduki zituzten.

         Hala ere, ikasleen arteko harremanak sendotzeko eta euren autonomian aurrera egiteko ere irteera aproposa izan zen. Eguraldiaz kezkati abiatu baginen ere, ateri izan genuen eta kanpoko ekintzetan gozatu ahal izan zuten.

         Azkenik, nekatuta eta lo gutxi eginda bazen ere, denok pozik itzuli ginen.

UR ARAZTEGIAK EZAGUTZEN

       URA,  BIZITZAREN ITURRI gaia aztergai izanik, gure herriko uren nondik norakoa ezagutzera abiatu ginen martxoaren 13an eta 19an, bi taldetan banatuta, 4. mailako ikasle eta irakasleak. Lehendabizi Mendarora jo genuen, gure etxeetara datozen urak non jaso eta nola tratatzen diren ikustera. Bertan  baitago Kilimongo ur araztegia. Kanpoko eta barruko instalazioak eta garbiketen prozesua ikusi ondoren, hamaiketako ordua izan genuen. Indarrak batu eta Arronamendi aldera jo genuen. Sakonera jetsi, eta Deba eta Itziarko ur zikinak nola garbitzen diren ezagutu genuen. Harrigarria nola tratatzen diren eta itsasoratu aurretik nola garbitzen diren. Irteera benetan interesgarria gertatu zitzaigun. 
      Hurrengo egunetan irteera aztertu, Goldea aldizkarirako lana prestatu eta gelan uraren propietateak aztertu genituen.




 

LEINTZ-GATZAGA (HIRUERREKETA)

   Ikasturte berriarekin batera, DEBABARRENA gure eskualdea aztertu genuen hilabetean zehar. Horrela,  urriaren 11n, eguraldi aparta lagun, eskualdea lotzen duen Deba ibaiari jarraituz, lehen irteera pedagogikoa burutu genuen.
  Arlaban mendatearen gainean autobusak utzi eta gidariarekin, Deba ibaia jaiotzen den Hiruerreketa ingurua aztertzen ibili ginen, baso inguruak arakatuz, baita karobi baten barruan sartu ere.
  Dorleta inguruan bazkaldu eta gero, Gatz-museoaren nondik norakoak eta bertako istorioak ezagutu genituen. Oso interesgarria guztia, baina Arteondoren autobusak zai zeudela eta, ia jolasteko tarterik gabe, Deba ibaiaren uren norabidean, eskolarantz itzuli ginen. Asko ikasiz, ederki pasa genuen.

GAURKO NEKAZARITZA ETA ABELTZANTZA

  Gaur egun baserrietan  nola egiten den lan aztertzera abiatu ginen maiatzeko bi egun desberdinetan. Horretarako 3. mailakoak bi taldetan banatu ginen, Debarroak antolatu bezala.

   Lehendabizi Elgoibarko Zeleta baserriko negutegietan ibili ginen nekazaritzako molde ekologiko berrien nondik norakoak ezagutzen. Tomate ederrak nola ateratzen diren ikusi genuen.

   Handik Aretxabaletako Etxebarria baserrira joan ginen Urkulu urtegiaren inguruetara. Han esne ekoizpena gaurko ikuiluetan nola robotizatu den harritzeko aukera izan genuen. Zein baino zein interesgarriagoak izan ziren bi bisitaldiak.

ARANTZAZUKO PARKETXEA

 Eguraldi ederra lagun, martxoaren 30ean, autobusetan, Arantzazuko Parke Naturalera abiatu ginen 3. mailako ikasle eta irakasleak. Bertan bi taldetan banatu eta ekintzak burutu genituen. Alde batetik, inguruetako ibilbide erraz batean, bertako klima urtaro desberdinetan aztertu genuen. Bestetik, Pello Zabalaren ahotik, meteorologiaren hastapenak ezagutu genituen. Baita  ipar-orratzarekin joku-tailer bat burutu ere tartean. Azkenik Aizkorriko Parke Naturala maketa haundi batean ezagutzeko aukera izan genuen. Bazkaldu eta jolasteko denbora gutxi geratu bazitzaigun ere, asko ikasi eta primeran pasa genuen.

EGIPTO, NILO IBAIAREN OPARIA

Bigarren gaiari amaiera polit eta eder bat emateko, honi buruzko maketa bat sortu dugu material eta objektu ezberdinak erabiliz. Amaitutakoan, lehen mailako ikasleak etorri dira aurkezpena entzutera eta gaiari buruz ikastera. Bertan, Egipto eta Nilo ibaiari buruz zenbait aspektu azaldu ditugu: kokapena, bizimodua, Jainkoak, eraikinak... Aurkezpena amaitzeko txiste eta asmakizun bikainak kontatu ditugu.

EGIPTO